আপুনি মোক ভুল নুবুজিব

মোৰ আবেগবোৰ
আপোনাৰ এনাজৰীৰে পকোৱা আছিল ,
মোৰ সেন্দুৰীয়া সপোনবোৰত ৰহণ সানিছিল
আপোনাৰ মোহময়ী কন্ঠস্বৰে ;
কিন্ত আপোনাৰ আবেগবোৰ
মোৰ হব পৰা নাছিল ।

আপুনি মোক ভুল নুবুজিব
আপোনাৰ প্ৰেমত হাবাথুৰি খোৱাৰ বাবে ,
আপোনাৰ বিশ্বাসে
আঘাট কৰিলে মোৰ স্বাভিমানক ।

হয় আপুনি মোক ভুল নুবুজিব
আপোনাৰ গানৰ কলিবোৰ আদৰি লোৱাৰ বাবে ,
সেইবোৰে তৰ্জন গৰ্জন কৰি আছে
মোৰ চিনাকি সুৰৰ চোতালত ।

সুধিব পাৰো নে আপোনাক
আপুনি মোক জীৱন দিলে নে কাঢ়ি নিলে ?

তৰা=২

তৰা
তুমি উচুপি নুঠিবা ,
তোমাৰ হিয়াৰ ঝংকাৰে
মোৰ পদুলিত হাহাকাৰ কৰে ;
মই অবাক হৈ পৰো
তোমাৰ ৰণাংগণৰ সুবাস লৈ ।।

আধৰুৱা সত্ত্বা

একা বেকা কেকুৰীটোত
সন্ধিয়াৰ চয়াময়া চা ;
ধুলি উৰুৱাই আহিছে
আধৰুৱা সত্ত্বা ।।

সাগৰখন দেখিছা ?
বৈ যায় অনুভুতিবোৰ বিলাই ।
মইও বৈ যাম
নিঃশব্দে নিৰবে ।।
নিশা তৰাবোৰে উচুপি উঠিব
তুমি হয়তো অনুভৱ নকৰিবা সিহতৰ উচুপনি ,
কিন্ত সিহতে মোৰ কাৰণে কান্দি উঠিব ।

মোৰ অনুভৱৰ বৰষুণ

মনৰ নিজানত
অকলশৰে
উচুপি উঠিছে ,
সিপাৰৰ আকাশখনত মাদল বাজিছে
আজি মই সিক্ত
মোৰ অনুভৱৰ বৰষুণত ।।

স্খলন

১) চিনাকি অচিনাকি
এবুকু মৰম
আৰু স্খলন এটি অবাস্তৱ নিশাৰ ।।


২) আশা কৰো
 লঠঙা সপোনবোৰ
সেউজীয়া হব বহাগৰ দৰে ।।

৩) আপোনাৰ শব্দবোৰে মোক নিচুকায়

সময় নাপাও আপোনাক নিঃশব্দে চাই ৰবলৈ ।।


৪)মোৰ মন পদুলিত মাথো তোমাৰ অপেক্ষা 

কেতিয়া আহিবা কেতিয়া ৰচিবা এখন সপোনৰ নাট


৫) তৰাতুমি আকাশৰ উৰ্মিমালা ,
নদীখনৰ বুকুত তোমাৰ প্ৰতিচ্ছবি
মোৰ বুকুখনতো তুষাৰ ধুমুহা ।।


৬) মোৰ মৰমবোৰ বতাহৰ আৰে আৰে উৰি ফুৰে

তুমি মাথো অনুভৱ কৰা কিন্ত চুই চাবলৈ নিবিচৰা ।।


৭) নিয়ৰ সনা বুকুত 

তোমাৰ হেজাৰ বাসনা ,
তোমাৰ দুচকুত
মোৰেই কল্পনা ।।


৮)লিখোতে লিখোতে মিঠা মিঠা শব্দবোৰ শেষ হল 

তথাপিও হেনো মই ভাল পাব জানো
ভাগৰুৱা সমাধি ।।


৯)বহু দিন হল

তোমাৰ বুকুত হালধীয়া ফুল ফুলা নাই ,
বহু দিন হল
হালধীয়া ফুলৰ মৌৰ সোৱাদ লোৱা নাই ।।